கேரள சட்டசபை தேர்தலை முன்னிட்டு திருவனந்தபுரம் தொகுதியில் போட்டியிடும் பாஜக வேட்பாளர் ராஜீவ் சந்திரசேகர், பெங்களூருவில் தனக்கு சொந்தமான சுமார் ரூ. 200 கோடி மதிப்புள்ள சொகுசு பங்களா குறித்த விவரங்களை தேர்தல் ஆணையத்திடம் தாக்கல் செய்த பிரமாணப் பத்திரத்தில் மறைத்துள்ளதாக காங்கிரஸ் கட்சி குற்றம் சாட்டியுள்ளது.
பெங்களூருவின் புகழ்பெற்ற கோரமங்களா பகுதியில் சுமார் 49,000 சதுர அடி பரப்பளவில் அமைந்துள்ள ஒரு பிரம்மாண்ட பங்களா ராஜீவ் சந்திரசேகருக்கு சொந்தமானது என்றும், அதன் நில மதிப்பு மட்டுமே ரூ. 200 கோடிக்கு மேல் இருக்கும் என்றும் காங்கிரஸ் தரப்பில் கூறப்படுகிறது. சொத்து வரி பதிவுகள் மற்றும் பழைய தேர்தல் பிரமாணப் பத்திரங்களை மேற்கோள் காட்டிப் பேசிய காங்கிரஸ் தலைவர்கள், அவர் வேண்டுமென்றே இந்தத் தகவலை மறைத்துள்ளதாகத் தெரிவித்துள்ளனர்.
மக்கள் பிரதிநிதித்துவச் சட்டத்தின் கீழ், தவறான தகவல்களைத் தருவது அல்லது முக்கிய விவரங்களை மறைப்பது தகுதி நீக்கத்திற்கு வழிவகுக்கும் என்பதால், அவர் மீது தேர்தல் ஆணையம் கடும் நடவடிக்கை எடுக்க வேண்டும் என காங்கிரஸ் வலியுறுத்தியுள்ளது.
இந்தக் குற்றச்சாட்டுகளை ராஜீவ் சந்திரசேகர் வன்மையாக மறுத்துள்ளார். காங்கிரஸ் கட்சி கடந்த 15 ஆண்டுகளாகத் தன் மீது இது போன்ற கற்பனையான பொய்களைக் கூறி வருவதாகவும், பழைய குற்றச்சாட்டுகளையே மீண்டும் புதிய வடிவில் பரப்பி வருவதாகவும் அவர் பதிலடி கொடுத்துள்ளார். தான் சட்டத்திற்கு உட்பட்டே அனைத்து சொத்து விவரங்களையும் தாக்கல் செய்துள்ளதாக அவர் குறிப்பிட்டுள்ளார்.
ஏற்கனவே கேரளாவில் காங்கிரஸ், இடதுசாரிகள் மற்றும் பாஜக இடையே மும்முனைப் போட்டி நிலவி வரும் சூழலில், இந்தச் சொத்து விவகாரம் தேர்தல் களத்தில் முக்கிய விவாதப் பொருளாக மாறியுள்ளது. திருவனந்தபுரம் தொகுதியில் சுமார் ரூ. 93 கோடி மதிப்பிலான சொத்துக்கள் தனக்கு இருப்பதாக ராஜீவ் சந்திரசேகர் ஏற்கனவே அறிவித்திருந்த நிலையில், தற்போது காங்கிரஸ் கிளப்பியுள்ள இந்த புதிய சர்ச்சை வாக்காளர்களிடையே பெரும் குழப்பத்தை ஏற்படுத்தியுள்ளது.
இந்த விவகாரத்தில் தேர்தல் ஆணையம் விரிவான விசாரணை நடத்தி உண்மைத் தன்மையை விளக்க வேண்டும் என எதிர்க்கட்சிகள் தொடர்ந்து கோரிக்கை விடுத்து வருகின்றன.(Online Tamil News)
