மத்தியப் பிரதேச மாநிலம் இந்தூரில் உள்ள பிரிஜேஸ்வரி அனெக்ஸ் பகுதியில், மின்சாரக் காரை சார்ஜ் செய்தபோது ஏற்பட்ட பயங்கர வெடிப்பு மற்றும் தீ விபத்தில் ஒரே குடும்பத்தைச் சேர்ந்த 8 பேர் பரிதாபமாக உயிரிழந்தனர்.
இன்று அதிகாலை சுமார் 3:30 மணியளவில் தொழிலதிபர் ஒருவரின் வீட்டின் வெளியே நிறுத்தப்பட்டிருந்த மின்சாரக் கார் சார்ஜ் செய்யப்பட்டு கொண்டிருந்தபோது, எதிர்பாராதவிதமாக வெடித்துச் சிதறியது. இந்தத் தீ மிக வேகமாக வீட்டின் தரைத்தளத்திற்குப் பரவியதுடன், அங்கிருந்த சுமார் 10 சமையல் எரிவாயு சிலிண்டர்களும் அடுத்தடுத்து வெடித்ததால் நிலைமை மோசமானது.
இந்த விபத்தின்போது வீட்டின் கதவுகள் அனைத்தும் எலக்ட்ரானிக் லாக் முறையினால் பூட்டப்பட்டிருந்தன. தீ விபத்து காரணமாக மின்சாரம் துண்டிக்கப்பட்டதால், அந்த மின்சாரப் பூட்டுகள் இயங்காமல் போயின. இதன் விளைவாக உள்ளே இருந்தவர்கள் வெளியே வர முடியாமல் தீயிலும் புகையிலும் சிக்கிக்கொண்டனர். உயிரிழந்த 8 பேரில் இரண்டு சிறுவர்களும் அடங்குவர். மருத்துவர்களின் முதற்கட்டத் தகவலின்படி, தீக்காயங்களை விட புகையினால் ஏற்பட்ட மூச்சுத்திணறல் காரணமாகவே அதிக உயிரிழப்புகள் ஏற்பட்டுள்ளதாகத் தெரிகிறது.
இந்தச் சம்பவம் குறித்து தகவல் அறிந்த மாநில அமைச்சர் கைலாஷ் விஜயவர்கியா நேரில் சென்று ஆய்வு நடத்தினார். பலத்த காயமடைந்த 3 பேர் தற்போது மருத்துவமனையில் தீவிர சிகிச்சை பெற்று வருகின்றனர். மின்சார வாகனங்களை சார்ஜ் செய்யும்போது கடைபிடிக்க வேண்டிய பாதுகாப்பு விதிமுறைகள் மற்றும் இந்த விபத்துக்கான சரியான காரணம் குறித்து உயர்மட்ட விசாரணைக்கு மாநில அரசு உத்தரவிட்டுள்ளது. இந்த கோர விபத்து அந்தப் பகுதி முழுவதும் பெரும் சோகத்தை ஏற்படுத்தியுள்ளது.(Online Tamil News)
