ஹாலிவுட் திரையுலகின் மூத்த நடிகையும், ஆஸ்கார் விருதுக்கு பரிந்துரைக்கப்பட்டவருமான வலேரி பெரின் (Valerie Perrine), தனது 82-வது வயதில் காலமானார். கடந்த 15 ஆண்டுகளுக்கும் மேலாக ‘பார்கின்சன்’ (Parkinson’s disease) எனும் நரம்பு மண்டல பாதிப்பு நோயால் அவதிப்பட்டு வந்த அவர், சிகிச்சை பலனின்றி உயிரிழந்தார்.
1978-ம் ஆண்டு வெளியான புகழ்பெற்ற ‘சூப்பர்மேன்’ (Superman) திரைப்படத்தில் ‘ஈவ் டெஷ்மேக்கர்’ (Eve Teschmacher) என்ற கதாபாத்திரத்தில் நடித்ததன் மூலம் வலேரி உலகளவில் பிரபலமானார். இவரது எதார்த்தமான நடிப்பும், கவர்ச்சியான தோற்றமும் அந்த காலகட்டத்தில் ரசிகர்களிடையே பெரும் வரவேற்பைப் பெற்றது. இது தவிர, 1974-ல் வெளியான ‘லென்னி’ (Lenny) திரைப்படத்தில் சிறப்பாக நடித்ததற்காக, சிறந்த நடிகைக்கான கேன்ஸ் திரைப்பட விழா விருது மற்றும் ஆஸ்கார் விருதுக்கான பரிந்துரையையும் இவர் பெற்றார் என்பது குறிப்பிடத்தக்கது.
சுமார் 15 ஆண்டுகளுக்கு முன்பு இவருக்கு பார்கின்சன் நோய் இருப்பது கண்டறியப்பட்டது. அன்றிலிருந்து இந்நோயுடன் போராடி வந்த அவர், பொது நிகழ்ச்சிகளில் பங்கேற்பதைத் தவிர்த்து வந்தார். அவரது உடல்நிலை மோசமடைந்த போதிலும், தனது போராட்ட குணத்தை அவர் ஒருபோதும் கைவிடவில்லை என்று அவரது நெருங்கிய வட்டாரங்கள் தெரிவிக்கின்றன.
திரையுலகில் தனது தனித்துவமான முத்திரையைப் பதித்த வலேரி பெரின், நடிப்பைத் தாண்டி மாடலிங் துறையிலும் சிறந்து விளங்கினார். இவரது மறைவையொட்டி ஹாலிவுட் நட்சத்திரங்கள் பலரும் சமூக வலைதளங்கள் வாயிலாகத் தங்கள் ஆழ்ந்த இரங்கலைத் தெரிவித்து வருகின்றனர்.(Online Tamil News)
