வாரத்தின் முதல் வர்த்தக நாளான இன்று, மும்பை பங்குச்சந்தை குறியீட்டு எண்ணான சென்செக்ஸ் சுமார் 1,800 புள்ளிகளுக்கு மேல் சரிந்து முதலீட்டாளர்களை நிலைதடுமாறச் செய்தது. இந்தத் திடீர் வீழ்ச்சியால், மும்பை பங்குச்சந்தையில் பட்டியலிடப்பட்டுள்ள நிறுவனங்களின் ஒட்டுமொத்த சந்தை மதிப்பு சுமார் 14 லட்சம் கோடி ரூபாய் குறைந்தது. தேசிய பங்குச்சந்தை குறியீட்டு எண்ணான நிஃப்டியும் 600 புள்ளிகளுக்கு மேல் சரிந்து 22,500 என்ற நிலைக்குக் கீழ் சென்றது.
இந்தக் கடும் வீழ்ச்சிக்கு உலகளாவிய அரசியல் சூழலே முக்கிய காரணமாகப் பார்க்கப்படுகிறது. குறிப்பாக, மத்திய கிழக்கு நாடுகளில் நிலவும் போர் பதற்றம் உலக நாடுகளை அச்சத்தில் ஆழ்த்தியுள்ளது. ஈரானுக்கும் இஸ்ரேல்-அமெரிக்கா கூட்டணிக்கும் இடையேயான மோதல் முற்றியுள்ள நிலையில், கச்சா எண்ணெய் போக்குவரத்து பாதிக்கப்படலாம் என்ற பயம் அதிகரித்துள்ளது. இதன் விளைவாக கச்சா எண்ணெய் விலை பீப்பாய்க்கு 110 டாலரைத் தாண்டியதும், அமெரிக்க டாலருக்கு எதிரான இந்திய ரூபாயின் மதிப்பு வரலாறு காணாத வீழ்ச்சியைச் சந்தித்ததும் இந்தியச் சந்தையைப் படுபாதாளத்திற்குத் தள்ளியது.
பங்குச்சந்தையின் இந்தச் சரிவால் டைட்டன், டாடா ஸ்டீல் மற்றும் அல்ட்ராடெக் சிமெண்ட் போன்ற முன்னணி நிறுவனங்களின் பங்குகள் கடுமையாகப் பாதிக்கப்பட்டன. வெளிநாட்டு முதலீட்டாளர்கள் தொடர்ந்து இந்தியப் பங்குகளை விற்பனை செய்து வெளியேறுவது சந்தையின் நிலையை மேலும் மோசமாக்கியுள்ளது. வரும் நாட்களில் போர் பதற்றம் தணிந்தால் மட்டுமே சந்தை மீண்டும் பழைய நிலைக்குத் திரும்ப வாய்ப்புள்ளதாகப் பொருளாதார நிபுணர்கள் கருதுகின்றனர். அதுவரை முதலீட்டாளர்கள் மிகுந்த எச்சரிக்கையுடன் செயல்பட அறிவுறுத்தப்படுகிறார்கள்.(Online Tamil News)
