எலித் துளை சுரங்கம் (Rat-hole mining) என்பது நிலக்கரி போன்ற கனிமங்களை எடுக்க, மனிதர்கள் நுழையக்கூடிய அளவிலான மிகக் குறுகிய, சிறிய துளைகளைத் தோண்டி மேற்கொள்ளப்படும் ஆபத்தான சுரங்க முறையாகும். மேகாலயாவில் பரவலாகப் பயன்படும் இது, சுற்றுச்சூழல் மற்றும் பாதுகாப்பு காரணங்களுக்காக தேசிய பசுமைத் தீர்ப்பாயத்தால் (NGT) இந்தியாவில் தடை செய்யப்பட்டுள்ளது
18 பேர் உயிரிழப்பு
மேகாலயா மாநிலம் கிழக்கு ஜெயந்தியா ஹில்ஸ் பகுதியில் அமைந்துள்ள சட்டவிரோத நிலக்கரி சுரங்கம் ஒன்றில் நேற்று ஏற்பட்ட சக்திவாய்ந்த வெடிவிபத்தில் சிக்கி 18 தொழிலாளர்கள் பரிதாபமாக உயிரிழந்தனர். எலித் துளை சுரங்கம் என்று அழைக்கப்படும் இந்த ஆபத்தான சுரங்க முறையில் தொழிலாளர்கள் பணிபுரிந்து கொண்டிருந்தபோது இந்த விபத்து நிகழ்ந்துள்ளது. சுரங்கத்தின் உள்ளே இன்னும் பலர் சிக்கியிருக்கலாம் என்று அஞ்சப்படுவதால், அங்கு மீட்புப் பணிகள் போர்க்கால அடிப்படையில் நடைபெற்று வருகின்றன.(Online Tamil News)
தேசிய பேரிடர் மீட்புப் படையினர் மற்றும் உள்ளூர் காவல்துறையினர் இணைந்து விபத்து நடந்த இடத்தில் மீட்பு நடவடிக்கைகளை மேற்கொண்டு வருகின்றனர். சுரங்கப்பாதை மிகவும் குறுகலாகவும், நிலத்தடி நீர் கசிவு அதிகமாகவும் இருப்பதால் மீட்புக் குழுவினர் பெரும் சவால்களை எதிர்கொண்டு வருகின்றனர். உயிரிழந்தவர்களின் உடல்களை மீட்கும் பணிகள் ஒருபுறம் நடக்க, உள்ளே சிக்கியுள்ளவர்களை உயிருடன் மீட்பதற்கான அனைத்து முயற்சிகளும் மேற்கொள்ளப்பட்டு வருகின்றன.
மேகாலயாவில் (Meghalaya) இத்தகைய எலி வளை சுரங்கங்களுக்கு தேசிய பசுமை தீர்ப்பாயம் ஏற்கனவே தடை விதித்துள்ள போதிலும், சட்டவிரோதமாக இச்செயல்பாடுகள் தொடர்ந்து நடைபெற்று வருவது பெரும் சர்ச்சையை ஏற்படுத்தியுள்ளது. இந்த விபத்து தொடர்பாக மாநில அரசு உயர்மட்ட விசாரணைக்கு உத்தரவிட்டுள்ளதுடன், சட்டவிரோத சுரங்க உரிமையாளர்கள் மீது கடும் நடவடிக்கை எடுக்கப்படும் என்றும் உறுதி அளித்துள்ளது. உயிரிழந்த தொழிலாளர்களின் குடும்பத்தினருக்கு இழப்பீடு வழங்குவது குறித்தும் ஆலோசிக்கப்பட்டு வருகிறது.
