ஊழல் கட்சிகளுடன் கூட்டணி இல்லை என்கிறார் தவெக நிர்வாகி நிர்மல்குமார். ஊழல் சக்திகள் வெற்றி பெறாது என்கிறார் தவெக தலைவர் விஜய். முதல்வரே விசில் சின்னத்திற்கு வாக்களிக்க கேட்பார் என்று தவெக மூன்றாம் ஆண்டு விழாவில் பேசி இருக்கிறார் விஜய். பாஜக மற்றும் திமுக, அதிமுகவை விஜய் இப்படி கடுமையாக விமர்சனம் செய்ததற்கு எழுந்திருக்கும் எதிர்வினைகள்:
திமுக செய்தி தொடர்பு தலைவர் டி.கே.எஸ். இளங்கோவன்: ’’மிகச்சிறந்த காமெடியனாக மாறிக்கொண்டிருக்கிறார் விஜய். கதாநாயகன் வாய்ப்பு குறைந்துவிட்டால் காமெடியனாக மாறிவிடலாம் என்று முயற்சி செய்கிறார்.
நாங்கள் அதிகாரத்தில் இருந்தாலும் இல்லாவிட்டாலும் மக்களுக்காக களத்தில் நிற்போம். ஆனால் விஜய்யோ, வாக்களித்து வெற்றி பெற வைத்தால் மட்டுமே வெளியே வருவேன் என்கிறார். திமுகவை வீழ்த்துவேன் என்கிறார். அவரை தங்கள் பக்கம் இழுக்கலாம் என்று முயற்சித்த பாஜக கூட பல புள்ளிவிபரங்களின் அடிப்படையில் அவரை தங்கள் பக்கம் இழுக்கும் முயற்சியை கைவிட்டு அவரை புறக்கணித்துவிட்டது. இந்த நிலையில்தான் இருக்கிறது தவெகவின் செல்வாக்கு.
ஊழல் பற்றி பேசும் விஜய் முதலில் தன் படங்களில் விற்கப்படும் பிளாக் டிக்கெட் குறித்து விளக்கமளிக்கட்டும்.
’’விஜய் கடைசி வரைக்கும் டான்ஸ் ஆடிக்கொண்டே இருக்க வேண்டியதுதான்’’ என்கிறார் தமிழக பாஜக தலைவர் நயினார் நாகேந்திரன்.
திண்டுக்கல் சீனிவாசன், முன்னாள் அதிமுக அமைச்சர்: விஜய் ஊழல்வாதியா? இல்லையா? விஜய்யின் அருகில் உள்ளவர்கள் நேர்மையானவர்களா? விஜய் முதலில் தன்னை ஊழல்வாதி இல்லை என்பதை நிரூபித்துவிட்டு அதிமுகவை ஊழல் சக்தி என்று சொல்லட்டும். சிபிஐ என்ன சொன்னது என்று தெரியவில்லை. சிபிஐ விசாரணைக்கு பின்னர் பாஜகவை விமர்சிப்பதை விட்டுவிட்டார் விஜய். அமித்ஷாவே சொல்லிவிட்டார் கூட்டணிக்கு எடப்பாடி பழனிசாமிதான் தலைவர் என்று. விஜய்க்கு இது எல்லாம் தெரியாது.
