சுமார் 3,300 ஆண்டுகளுக்கு முன்பு எகிப்தை ஆண்ட இளம் மன்னன் துட்டன்காமனின் கல்லறை, தொல்லியல் துறையில் எப்போதும் ஒரு தீராத அதிசயம்.
1922-ஆம் ஆண்டு ஹோவர்ட் கார்ட்டர் என்பவரால் இந்த முழுமையான கல்லறை கண்டுபிடிக்கப்பட்டபோது, அங்கு குவித்து வைக்கப்பட்டிருந்த 5,000-க்கும் மேற்பட்ட பொருட்களில் உலகையே வியக்க வைத்தது அந்த மன்னனின் ‘ஷூ ரேக்’ எனப்படும் காலணி சேமிப்புதான். சமீபத்தில் கெய்ரோவில் உள்ள கிராண்ட் எகிப்திய அருங்காட்சியகத்தில் இவை காட்சிப்படுத்தப்பட்டபோது, அதிலுள்ள சில அதிர்ச்சியூட்டும் உண்மைகள் வெளிச்சத்திற்கு வந்துள்ளன.
எதிரிகளை மிதிக்கும் காலடிகள்
மன்னன் துட்டன்காமனின் அலமாரியில் இருந்த 80-க்கும் மேற்பட்ட காலணிகளில் பல, வெறும் அலங்காரப் பொருட்கள் அல்ல. அவை ஒரு போர் வீரனின் அதிகாரத்தைச் சொல்லும் சின்னங்கள். குறிப்பாக, சில தோல் மிதியடிகளின் உட்புறத்தில் (Insoles) ஆப்பிரிக்க மற்றும் ஆசிய எதிரிகளின் உருவங்கள் மிக நுணுக்கமாகச் செதுக்கப்பட்டுள்ளன. மன்னன் ஒவ்வொரு அடி எடுத்து வைக்கும்போதும், தன் காலடியில் எதிரிகளை மிதித்து நசுக்குகிறான் என்பதை இது பறைசாற்றுவதாக ஆராய்ச்சியாளர்கள் தெரிவிக்கின்றனர்.
உடல் ஊனத்தை மறைத்த நவீன வடிவமைப்பு
இந்தக் காலணிகளில் உள்ள மற்றொரு சுவாரசியமான திருப்பம், மன்னனின் உடல்நிலை சார்ந்தது. நவீன ‘சிடி ஸ்கேன்’ (CT Scan) ஆய்வுகள் துட்டன்காமனுக்கு ‘கிளப் ஃபுட்’ (Clubfoot) எனப்படும் காலில் ஏற்பட்ட பிறவிக் குறைபாடு இருந்ததை உறுதி செய்துள்ளன. இதற்காகவே சில காலணிகளில் பிரத்யேகமான பிணைப்பு முறைகள் (Strap configurations) பயன்படுத்தப்பட்டுள்ளதாக தெரிவிகிக்கப்படுகிறது. ஒரு சராசரி மனிதனின் காலணிகளை விட மாறுபட்ட இந்த வடிவமைப்பு, 3,000 ஆண்டுகளுக்கு முன்பே எகிப்தியர்கள் ‘ஆர்த்தோபெடிக்’ (Orthopedic) தொழில்நுட்பத்தில் சிறந்து விளங்கினர் என்பதைக் காட்டுகிறது.
தங்கமும் பனை ஓலையும் !
அன்றாடப் பயன்பாட்டிற்கு நாணல் மற்றும் பனை ஓலைகளால் ஆன எளிய காலணிகளையும், சடங்குகளின் போது அணிவதற்கு தங்கம் மற்றும் ரத்தினங்கள் பதிக்கப்பட்ட ஆடம்பரமான காலணிகளையும் அந்த இளம் மன்னன் பயன்படுத்தியுள்ளார்.
மன்னனின் மம்மி கண்டெடுக்கப்பட்டபோது, அதன் கால்களில் இருந்த தங்க உறைகளும் (Toe covers) தங்க மிதியடிகளும் இன்றும் சிதையாமல் மின்னுகின்றன.தற்போது, இந்த அபூர்வக் காலணிகள் அனைத்தும் நவீன தொழில்நுட்பத்துடன் கூடிய கண்ணாடிப் பேழைகளில் பாதுகாக்கப்பட்டு வருகின்றன.
