மலேசிய நாட்டின் அரசியல் வரலாற்றில் இதுவரை இல்லாத ஒரு மிகப்பெரிய மாற்றத்தை பிரதமர் அன்வார் இப்ராகிம் தலைமையிலான அரசு முன்னெடுத்துள்ளது. தற்போது நடைமுறையில் உள்ள சட்டப்படி, நாடாளுமன்றத்தில் பெரும்பான்மை உறுப்பினர்களின் ஆதரவு இருக்கும் வரை ஒருவர் எத்தனை முறை வேண்டுமானாலும், எத்தனை ஆண்டுகள் வேண்டுமானாலும் பிரதமர் பதவியில் நீடிக்க முடியும். இந்த முறையினால் ஒரே நபர் நீண்ட காலம் அதிகாரத்தில் இருப்பதும், அதனால் ஊழல் மற்றும் அதிகார துஷ்பிரயோகம் ஏற்பட வாய்ப்புள்ளதாகவும் கருதப்பட்டது. இதனை மாற்றியமைக்கவே, ஒரு நபர் தன் வாழ்நாளில் அதிகபட்சமாக 10 ஆண்டுகள் மட்டுமே பிரதமர் பதவியை வகிக்க முடியும் என்ற சட்டத் திருத்தம் கொண்டு வரப்பட்டுள்ளது.
இந்த அதிரடி மாற்றத்திற்கு மிக முக்கியமான காரணம் மலேசியாவின் கடந்த கால அரசியல் சூழல்தான். முன்னாள் பிரதமர் மகாதீர் முகமது இரண்டு வெவ்வேறு காலகட்டங்களில் மொத்தம் 24 ஆண்டுகள் பிரதமராகப் பதவி வகித்தார். இவ்வளவு நீண்ட காலம் ஒருவர் பதவியில் இருக்கும்போது, அடுத்த தலைமுறைத் தலைவர்கள் உருவாவது தடுக்கப்படுவதாக விமர்சனங்கள் எழுந்தன. இதனைச் சரிசெய்யவே, அன்வார் இப்ராகிம் தனது தேர்தல் வாக்குறுதியில் “பிரதமர் பதவிக்குக் கால வரம்பு” என்பதை முதன்மைப்படுத்தினார். இப்போது அந்த வாக்குறுதியை நிறைவேற்றும் வகையில், அரசியலமைப்புச் சட்டத்தின் 43-வது பிரிவில் திருத்தம் செய்ய மலேசிய அமைச்சரவை ஒப்புதல் அளித்துள்ளது.
இந்த புதிய சட்டத்தின்படி, ஒருவர் தொடர்ந்து 10 ஆண்டுகள் பிரதமராக இருந்தாலும் சரி, அல்லது இடையில் சில ஆண்டுகள் பதவியில் இல்லாமல் இருந்து மீண்டும் பிரதமரானாலும் சரி, அவரது மொத்த பதவிக்காலம் 10 ஆண்டுகளைத் தாண்டக்கூடாது. இந்த விதிமுறை தற்போதைய பிரதமர் அன்வார் இப்ராகிமுக்கும் பொருந்தும் என்பதால், அவரும் 10 ஆண்டுகளுக்கு மேல் பதவியில் நீடிக்க முடியாது என்பது உறுதியாகியுள்ளது. இந்த வரலாற்றுச் சிறப்புமிக்க சட்டத் திருத்தம் மலேசிய நாடாளுமன்றத்தில் விரைவில் நிறைவேற்றப்பட உள்ளது.(Online Tamil News)
