உலகம் இன்று காலநிலை மாற்றம் என்ற பெரும் சவாலை எதிர்கொண்டு வருகிறது. அதிகரிக்கும் வெப்பநிலை, வறட்சி, காடழிப்பு மற்றும் மழை முறைகளில் ஏற்படும் மாற்றங்கள் மனித வாழ்வையே பாதிக்கும் நிலைக்கு வந்துள்ளன. இத்தகைய சூழலில், எண்ணெய் வள நாடாக அறியப்பட்ட சவுதி அரேபியா, சுற்றுச்சூழல் பாதுகாப்பு நோக்கில் 100 கோடி மரக்கன்றுகளை நடும் மாபெரும் திட்டத்தை அறிவித்துள்ளது. இந்த முயற்சி உலகம் முழுவதும் கவனத்தை ஈர்த்துள்ளதுடன், பாலைவனம் உண்மையில் பசுமையாக மாறுமா என்ற கேள்வியையும் எழுப்பியுள்ளது.
சவுதி அரேபியாவின் இயற்கை சூழல்
சவுதி அரேபியா (Saudi Arabia) பெரும்பாலும் பாலைவன நிலப்பரப்பைக் கொண்ட நாடாகும். அங்கு மழைப்பொழிவு மிகவும் குறைவு மற்றும் வெப்பநிலை கடுமையாக உயர்வது வழக்கமான ஒன்று ஆகும். மேலும், சில பகுதிகளில் கோடைக்காலத்தில் வெப்பநிலை 50 டிகிரி செல்சியஸை எட்டுகிறது. இத்தகைய சூழலில் தாவர வளர்ச்சி இயல்பாகவே கடினமாகிறது. தொடர்ந்து, மணல் நிறைந்த மண், ஈரப்பதம் குறைவு மற்றும் அடிக்கடி ஏற்படும் மணல் புயல்கள் மர வளர்ச்சிக்கு பெரும் தடைகளாக உள்ளன.
100 கோடி மரக்கன்றுகள் திட்டத்தின் நோக்கம்
இந்த நிலையில், இந்தத் திட்டத்தின் முக்கிய நோக்கம் சுற்றுச்சூழல் சமநிலையை மீட்டெடுப்பதாகும். அதிக அளவில் மரங்கள் வளர்க்கப்பட்டால், காற்றில் உள்ள கார்பன் டையாக்சைடு அளவு குறைந்து, ஆக்சிஜன் அளவு அதிகரிக்கும். இதன் மூலம் உலக வெப்பமயமாதலின் (Global Warming) தாக்கம் சற்று குறைய வாய்ப்பு உள்ளது. மேலும், பசுமை அதிகரிப்பதால் காற்றின் தரம் மேம்படும், வெப்பநிலை குறையும் மற்றும் மனிதர்களின் வாழ்வாதாரமும் உயர்வடையும்.
பாலைவனம் பசுமையாக மாறும் சாத்தியம்
பாலைவனப் பகுதிகளில் மரங்கள் வளர்ந்தால், அந்த இடங்களில் ஒரு புதிய மைக்ரோ காலநிலை உருவாகும் என்று ஆராய்ச்சியாளர்கள் தெரிவிக்கின்றனர்.மேலும், மரங்கள் நிழலை வழங்குவதால் நிலத்தின் வெப்பம் குறையும் மற்றும் இலைகள் மற்றும் தாவர கழிவுகள் மண்ணில் கலந்து மண் வளத்தை மேம்படுத்தும். இதனால் காலப்போக்கில், ஈரப்பதம் அதிகரித்து மழைப்பொழிவு சற்று அதிகரிக்கவும் வாய்ப்பு உள்ளது. இதன் விளைவாக, முற்றிலும் வறண்ட நிலமாக இருந்த பகுதி மெதுவாக பசுமை நிறைந்த இடமாக மாறக்கூடும் சாத்தியம் உள்ளதாக ஆராய்ச்சியாளர்கள் தெரிவிக்கின்றனர்.
எதிர்கொள்ள வேண்டிய சவால்கள்
இந்தத் திட்டம் பல சவால்களையும் கொண்டுள்ளது. குறிப்பாக, மரங்களுக்கு தேவையான நீரை தொடர்ந்து வழங்குவது மிகப்பெரிய பிரச்சினையாகும். இதனால், நீர்ப்பற்றாக்குறை ஏற்படுவதால், நாட்டின் நீர்வள மேலாண்மை மிகுந்த கவனத்துடன் செயல்பட வேண்டும். அதேபோல், பாலைவன சூழலுக்கு ஏற்ற மர வகைகளை தேர்வு செய்வதும் அவசியம். சரியான பராமரிப்பு இல்லையெனில், நடப்பட்ட மரங்கள் வளராமல் அழிந்துவிடும் அபாயமும் உள்ளது.
தொழில்நுட்பத்தின் பங்கு
இந்த சவால்களை சமாளிக்க சவுதி அரேபியா நவீன தொழில்நுட்பங்களைப் பயன்படுத்த திட்டமிட்டுள்ளது. அதாவது, உப்பு நீரை சுத்திகரித்து பயன்படுத்துதல், குறைந்த நீரில் அதிக விளைவு தரும் டிரிப் பாசன முறைகள் மற்றும் செயற்கை நுண்ணறிவு, செயற்கைக்கோள் கண்காணிப்பு போன்ற அறிவியல் முறைகள் இந்தத் திட்டத்திற்கு துணையாக உள்ளன.மேலும், தொழில்நுட்பமும் இயற்கையும் இணைந்து செயல்பட்டால், இந்த முயற்சி வெற்றியடையும் வாய்ப்பு அதிகம் உள்ளது.
உலகளாவிய முக்கியத்துவம்
இந்தத் திட்டம் வெற்றிபெற்றால், அது சவுதி அரேபியாவுக்கே மட்டுமல்ல, உலகின் பிற பாலைவன நாடுகளுக்கும் ஒரு முன்மாதிரியாக அமையும். மேலும், காலநிலை மாற்றத்திற்கு எதிரான போராட்டத்தில் மனிதன் எவ்வாறு இயற்கையுடன் இணைந்து செயல்பட முடியும் என்பதற்கான ஒரு முக்கிய எடுத்துக்காட்டாக இது இருக்கும். மேலும், பாலைவனம் என்றால் நிரந்தரமாக வறட்சி என்ற எண்ணத்தையும் இந்த முயற்சி மாற்றக்கூடும்.
முடிவாக, 100 கோடி மரக்கன்றுகள் நடும் சவுதி அரேபியாவின் திட்டம் (10 Billion Trees Project) ஒரு மிகப் பெரிய சவாலான முயற்சியாகும். மேலும், ஒரே நாளில் பாலைவனம் சோலைவனமாக மாறாது. ஆனால் நீண்டகால திட்டமிடல், அறிவியல் ஆதாரம், தொடர்ச்சியான பராமரிப்பு மற்றும் சுற்றுச்சூழல் பொறுப்புணர்வு இருந்தால், இன்று மணலும் வெப்பமும் மட்டுமே காணப்படும் இடங்களில் நாளை பசுமை மலரும் நாள் வரலாம். இந்தத் திட்டம் மனிதனின் இயற்கை மீதான பொறுப்பை நினைவூட்டும் ஒரு வரலாற்றுச் சின்னமாக மாறும் வாய்ப்பை கொண்டுள்ளது.
