ஆந்திரப் பிரதேச முதலமைச்சர் சந்திரபாபு நாயுடு, மாநிலத்தின் எதிர்கால நலனைக் கருத்தில் கொண்டு மக்கள் தொகைக் கொள்கையில் தலைகீழ் மாற்றத்தைக் கொண்டு வந்துள்ளார். கடந்த பல தசாப்தங்களாக “நாம் இருவர், நமக்கு இருவர்” என்ற கொள்கையை இந்தியா பின்பற்றி வந்த நிலையில், தற்போது ஆந்திராவில் பிறப்பு விகிதம் அபாயகரமான அளவில் குறைந்து வருவதை முதலமைச்சர் சுட்டிக்காட்டியுள்ளார்.
குறிப்பாக, தென்னிந்திய மாநிலங்களில் சராசரி பிறப்பு விகிதம் 1.6 ஆகக் குறைந்துள்ளதாகவும், இது 2.1 என்ற சமநிலை அளவை விட மிகக் குறைவு என்றும் அவர் கவலை தெரிவித்துள்ளார். இந்த நிலை நீடித்தால், வரும் 2047ம் ஆண்டிற்குள் ஆந்திரா இளைஞர்களே இல்லாத, முதியவர்கள் அதிகம் வாழும் மாநிலமாக மாறிவிடும் என்ற அச்சத்தின் காரணமாகவே, அதிக குழந்தைகளைப் பெற்றெடுக்கும் குடும்பங்களுக்கு ஊக்கத்தொகை வழங்கும் திட்டம் அறிவிக்கப்பட்டுள்ளது.
இந்த புதிய திட்டத்தின் கீழ், ஒரு குடும்பத்தில் மூன்றாவது குழந்தை பிறக்கும்போது அரசு உடனடியாக 25,000 ரூபாயை ஊக்கத்தொகையாக வழங்கும். இது ஒருமுறை வழங்கப்படும் தொகையாக இருந்தாலும், குழந்தையின் ஆரம்பகாலத் தேவைகளுக்காகவும், ஊட்டச்சத்தை உறுதி செய்யவும் அடுத்த ஐந்து ஆண்டுகளுக்கு மாதம் தோறும் 1,000 ரூபாய் வீதம் அரசு நிதி உதவி வழங்கும்.
மேலும், இதற்கு முன்பு இரண்டு குழந்தைகளுக்கு மேல் இருந்தால் உள்ளாட்சித் தேர்தல்களில் போட்டியிட முடியாது என்ற சட்டம் ஆந்திராவில் நடைமுறையில் இருந்தது. தற்போது அந்த தடையை நீக்கி, அதிக குழந்தைகள் உள்ளவர்களும் தேர்தலில் போட்டியிடலாம் என சட்டத் திருத்தம் கொண்டு வர முதல்வர் முடிவு செய்துள்ளார். இது மக்கள் தொகையைப் பெருக்குவதற்கான ஒரு அரசியல் மற்றும் சமூக உந்துதலாகப் பார்க்கப்படுகிறது. (Online Tamil News)
