பிட்காயின் மற்றும் கிரிப்டோகரன்சி சந்தை தற்போது 2026-ம் ஆண்டின் தொடக்கத்தில் ஒரு மிகப்பெரிய சவாலைச் சந்தித்து வருகிறது. கடந்த 2025-ம் ஆண்டின் இறுதியில் பிட்காயின் முன்னெப்போதும் இல்லாத வகையில் ஒரு கோடியே ஐந்து லட்ச ரூபாய் ($1,26,000) என்ற பிரம்மாண்ட உச்சத்தைத் தொட்டு வரலாற்று சாதனை படைத்தது. ஆனால், அந்த உற்சாகம் நீடிக்காமல் பிப்ரவரி 2026-ல் சந்தை தலைகீழாக மாறியுள்ளது. அமெரிக்க ஃபெடரல் வங்கியின் வட்டி விகித மாற்றங்கள் மற்றும் உலகளாவிய பொருளாதார மந்தநிலை குறித்த அச்சம் காரணமாக, பெரிய நிறுவனங்கள் தங்களது முதலீடுகளைத் திரும்பப் பெறத் தொடங்கின. இதனால் ஒரே வாரத்தில் மட்டும் பிட்காயின் மதிப்பு சுமார் 25 சதவீதத்திற்கும் மேல் சரிந்து முதலீட்டாளர்களைப் பெரும் அதிர்ச்சியில் ஆழ்த்தியுள்ளது.
இந்த திடீர் வீழ்ச்சிக்கு பிட்காயின் (Bitcoin) இடிஎஃப் (ETF) எனப்படும் முதலீட்டு நிதியிலிருந்து கோடிக்கணக்கான டாலர்கள் வெளியேறியதே முக்கியக் காரணமாகக் கூறப்படுகிறது. ஒருபுறம் பெரிய முதலீட்டாளர்கள் லாபத்தைப் பெற தங்கள் காயின்களை விற்பனை செய்ய, மறுபுறம் நஷ்டம் வந்துவிடுமோ என்ற பயத்தில் சிறு முதலீட்டாளர்களும் தங்கள் வசமிருந்த காயின்களை அவசரமாக விற்கத் தொடங்கினர். இது சந்தையில் ஒரு சங்கிலித் தொடர் எதிர்வினையை (Chain Reaction) உருவாக்கி விலையை மேலும் வீழ்ச்சிக்கு தள்ளியது.
இந்தியாவைப் பொறுத்தவரை, கிரிப்டோ பரிமாற்றங்கள் மீதான 30 சதவீத வரி மற்றும் ஒரு சதவீத டிடிஎஸ் (TDS) நடைமுறையில் உள்ள நிலையில், இந்த விலை வீழ்ச்சி இந்திய கிரிப்டோ வர்த்தகர்களின் நம்பிக்கையை வெகுவாகக் குறைத்துள்ளது.
இருப்பினும், கிரிப்டோ சந்தையின் வரலாற்றைப் பார்த்தால் இதுபோன்ற வீழ்ச்சிகள் புதியவை அல்ல என சில நிபுணர்கள் கருத்து தெரிவிக்கின்றனர். பிட்காயின் ஒவ்வொரு முறை பெரும் சரிவைச் சந்திக்கும் போதும், அதன்பின்னர் இன்னும் வலிமையாக மீண்டு வந்து புதிய உச்சங்களைத் தொடுவதை நாம் கடந்த காலங்களில் பார்த்திருக்கிறோம். தற்போதைய சூழலில் சந்தை எப்போது நிலைபெறும் என்று உறுதியாகச் சொல்ல முடியாவிட்டாலும், பிட்காயின் 22,000 டாலர் வரை செல்லக்கூடும் எனச் சிலரும், இது ஒரு தற்காலிகத் தடுமாற்றம் தான் எனச் சிலரும் விவாதித்து வருகின்றனர்.(Online Tamil News)
