செயற்கை நுண்ணறிவு தொழில்நுட்பத்தின் அசுர வளர்ச்சி காரணமாக உலக அளவில் ஐடி துறையில் பெரும் வேலைவாய்ப்பு இழப்புகள் ஏற்பட்டு வரும் நிலையில், ஃபேஸ்புக் மற்றும் வாட்ஸ்அப் நிறுவனங்களின் தாய் நிறுவனமான மெட்டா தனது மொத்த ஊழியர்களில் சுமார் 10 சதவீதப் பேரை, அதாவது 8,000 ஊழியர்களை ஒரே நாளில் அதிரடியாக வேலையை விட்டு நீக்கியுள்ளது.
இந்த பணிநீக்கத்தை மெட்டா நிறுவனம் கையாண்ட விதம் கார்ப்பரேட் வட்டாரத்தில் பெரும் கண்டனங்களை எழுப்பியுள்ளது, ஏனெனில் அலுவலகத்தில் ஊழியர்கள் ஒன்று கூடி எந்தவொரு சலசலப்பிலோ அல்லது போராட்டத்திலோ ஈடுபடக் கூடாது என்பதற்காக, பணிநீக்க நடவடிக்கைக்கு முன்பாக ஊழியர்கள் அனைவரும் வீட்டிலிருந்தே வேலை செய்யுமாறு மெட்டாவின் மனிதவள மேம்பாட்டுத் துறை திடீரென உத்தரவிட்டது.
ஊழியர்கள் அனைவரும் வீட்டிலிருந்தபடியே அடுத்த கட்ட அறிவிப்புக்காகக் காத்திருந்த நிலையில், பல நாட்டு ஊழியர்களுக்கும் அவர்களின் உள்ளூர் நேரப்படி அதிகாலை 4 மணிக்கே பணிநீக்கத்திற்கான மின்னஞ்சல் அனுப்பப்பட்டது, இதனால் ஊழியர்கள் காலையில் தூங்கி எழுவதற்கு முன்பாகவே அவர்களின் வேலை பறிக்கப்பட்டது. மெட்டா நிறுவனத்தின் தலைமை நிர்வாக அதிகாரி மார்க் ஜுக்கர்பெர்க், தற்போது நிறுவனத்தை ஏஐ தொழில்நுட்பத்திற்கு முன்னுரிமை அளிக்கும் நிறுவனமாக மாற்றுவதில் தீவிரமாக ஈடுபட்டுள்ளதாலும், மனிதர்கள் செய்யும் பெரும்பாலான வேலைகளை ஏஐ அமைப்புகள் மூலமாகவே தானியங்கி முறையில் மிகக் குறைந்த நேரத்தில் செய்து முடிக்க முடியும் என்பதாலும் இந்த பாரம்பரிய பொறியியல் மற்றும் தயாரிப்பு பிரிவுகளில் உள்ள ஊழியர்கள் நீக்கப்பட்டுள்ளனர்.
தங்களின் கணினி செயல்பாடுகளைக் கண்காணித்து அதன் மூலம் ஏஐ கருவிகளுக்குப் பயிற்சி அளிக்க மெட்டா முயல்வதாகக் கூறி ஊழியர்கள் ஏற்கனவே போராடி வந்த சூழலில் இந்த அதிரடி பணிநீக்கம் நடந்துள்ளதுடன், நீக்கப்பட்ட ஊழியர்களுக்கு அவர்களின் சேவைக்கால அடிப்படையில் குறிப்பிட்ட வாரங்களுக்கான அடிப்படைச் சம்பளத்துடன் கூடிய இழப்பீட்டுத் தொகை வழங்கப்படும் எனவும் மெட்டா நிறுவனம் அறிவித்துள்ளது.(Online Tamil News)
