ஒடிசா மாநிலம் புவனேஸ்வரில் உள்ள கிட் அரங்கில் நடைபெற்ற 61-வது ஃபெமினா மிஸ் இந்தியா 2026 அழகிப் போட்டியில், கோவாவைச் சேர்ந்த சாத்வி சதீஷ் சைல் மிஸ் இந்தியா பட்டத்தை வென்றுள்ளார்.
இந்தியாவின் பல்வேறு மாநிலங்களைச் சேர்ந்த 30 திறமையான போட்டியாளர்கள் பங்கேற்ற இந்த பிரம்மாண்டமான இறுதிப் போட்டியில், கடந்த ஆண்டு மிஸ் இந்தியா பட்டத்தை வென்ற மத்திய பிரதேசத்தைச் சேர்ந்த நிகிதா போர்வால், புதிய வெற்றியாளரான சாத்விக்கு வைர மகுடத்தைச் சூட்டி தனது வாழ்த்துகளைத் தெரிவித்தார்.
இந்தத் தொடரில் சாத்வி சதீஷ் சைல் முதலிடத்தைப் பிடித்த நிலையில், மகாராஷ்டிராவைச் சேர்ந்த ராஜ்நந்தினி பவார் முதல் ரன்னர்-அப் இடத்தையும், ஜம்மு காஷ்மீரைச் சேர்ந்த ஸ்ரீ அத்வைதா இரண்டாம் ரன்னர்-அப் இடத்தையும் பிடித்தனர். பாலிவுட் நட்சத்திரங்கள் மற்றும் கலைத்துறையைச் சேர்ந்த முக்கியப் பிரமுகர்கள் முன்னிலையில் நடைபெற்ற இந்த விழா, பல்வேறு கலை நிகழ்ச்சிகளுடன் மிகவும் கோலாகலமாக அரங்கேறியது.
தற்போது மிஸ் இந்தியா பட்டத்தை வென்றுள்ள சாத்வி சதீஷ் சைல், அடுத்ததாக 2027-ஆம் ஆண்டு நடைபெறவுள்ள உலக அழகி (Miss World) போட்டியில் இந்தியாவின் சார்பாகப் பங்கேற்கும் பெருமையைப் பெற்றுள்ளார். உலக அரங்கில் இந்தியாவின் கலாச்சாரம் மற்றும் பெருமையை நிலைநாட்டும் ஒரு தூதராக அவர் தனது பயணத்தைத் தொடர உள்ளார். கோவாவிலிருந்து மிஸ் இந்தியா பட்டத்தை வென்றுள்ள இவருக்குப் பல்வேறு தரப்பிலிருந்தும் பாராட்டுகள் குவிந்து வருகின்றன.(Online Tamil News)
